БИШКЕК, 11-июл. — Sputnik. Сириянын аймагындагы жымжырттык режими 11-июлдун түн ортосунда аяктай тургандыгы тууралуу Сирияны ынтымакташтыруу боюнча Россия түзгөн борбордун маалыматтык бюллетенинде көрсөтүлгөн.
"Сириядагы жымжырттык режими 72 саатка узартылып, 11-июлда саат 23.59да аяктайт", — деп айтылат Россиянын Коргоо министрлигинин сайтына чыккан маалыматта.
Жымжырттык режимге "Ислам мамлекети" менен "Жебхат ан-Нусра" террордук уюмдары каршы чыгууну улантып жатышканын Россиянын аскер ведомствосунан белгилешти.
"Ынтымакташуу" борборунун маалыматына караганда бир сутканын ичинде эле согушкерлер Эль-Хадер, Хандрат жана Ансар сыяктуу эл жыш жайгашкан аймактарды, Алеппо шаарындагы Шейх Максуд, Эль-Халидия, Аз-Загра, Хирбат Хирс кварталдарын жана Хомс провинциясын аткылашкан.
Сирияда ок чыгарууну токтотуу режими 27-февралда кабыл алынган. Бирок бул Бирикен улуттар уюму тарабынан террордук уюм катары таанылган "Ислам мамлекети" менен "Жебхат ан-Нусра" сыяктуу түзүлүштөргө тиешеси жок.
