БИШКЕК, 10-июл. — Sputnik. Бишкек шаарындагы эс алуу борборлорунун бириндеги бассейнге түшүп кеткен бала эс учун жоготуп №3 шаардык балдардын ооруканасына түшкөнүн аталган ооруканадан билдиришти.
Шаардык тез жардам кызматына бассейнге баланын чөгүп кеткени боюнча билдирүү түшкөнүн, бирок дарыгерлер окуя болгон жерге келгенде кырсыктаган жарандарды тапкан эмес. Нөөмөттө турган дарыгердин айтымында, баланы ооруканага алып кетишкен. Шаардык №3 балдардын ооруканасынан бассейнге түшүп кеткен бала травматологиянын кайра жандандыруу бөлүмүндө жатканын тастыкташты.
"Бала жекшемби күнү келип түшкөн. Учурда комада жатат, өзүнө келе элек", — дейт нөөмөттө турган дарыгер.
Милицияга билдирүү саат 15.27де келип түшкөнүн ШИИБ маалымдады.
"Ыкчам топ окуя болгон жерге барган. Бирок жабыркагандарды тапкан эмес. Аталган жайдын кызматкерлеринин айтымында, атасы баласын ооруканага алып кеткен. Бала 5 жашта эмес, жети жашта", — деп ШИИБден билдиришти. Учурда тергөө амалдары жүрүүдө.
"Тартуга" эс алуу борборунун кызматкеринин айтымында, атасы сууга түшүү үчүн алган жабдууларын тапшырууга кеткенде бала бассейнге кулап түшкөн.
"Алардын убактысы бүткөн, алар кетели деп жатышкан. Атасы ары басып кайта келгенде баласын таппай калды. Издөө иштери бир канча мүнөткө созулду. Куткаруучулар баланы бассейндин түбүнөн табышты", — дейт ал.
Баланы дароо оорканага алып барышкан, акыркы маалыматтар боюнча бала тирүү экенин мекеменин кызматкери кошумчалады.
