БИШКЕК, 13-июн. — Sputnik. Коомдук ишмер Дастан Сарыгулов кармалып, Улуттук коопсуздук боюнча мамлекеттик комитеттин убактылуу кармоо жайын киргизилгенин мекеменин маалымат кызматы билдирди.
Сарыгулов мамлекетти күч менен басып алууга даярдык көрүү боюнча кармалган Кубанычбек Кадыров, Бектур Асановго козголгон кылмыш ишинин жаңы жагдайларынан жана "Кумтөр" кенинин айланасындагы коррупциялык иштерге байланыштуу кармалган.
УКМКнын маалыматына ылайык, Сарыгулов "Кыргызалтын" ААКты жетектеп турганда коорупциялык иштерге барган.
"Камеко", "Кумтор Оперейтинг", "Кумтор голд", "Центерра Голд" компанияларынын мурдагы президенти Леонард Хоменюк "Кумтөр" кенин иштетүүнү Кыргызстан тараптан көзөмөлдөгөн "Кыргызалтын" ААКты 1992-1999-жылдары жетектеген Дастан Сарыгулов коррупциялык иштерге барганын өз көрсөтмөсүндө билдирген", — деп айтылат маалыматта.
УКМК "Кумтөр" долбоорун ишке ашыруудагы коррупциялык фактыларды иликтөө учурунда коррупциялык схеманы түзгөн фигуранттар — Акаев менен Бакиевдин үй-бүлөсүнө жакындар кендеги коррупциялык схемаларды жеке коммерциялык кызыкчылыктарынан улам анын ачылышына бир топ тоскоолдуктарды жаратканын баса белгилейт.
Дастан Сарыгулов буга чейин оппозиция өкүлдөрүнүн бийликти басып алуу боюнча сүйлөшкөн жазуулары интернетке тарап кеткен иш боюнча үй камагына алынган болчу. Кылмышка шектелип Кадыров менен Асанов кармалган.
Хоменюк — АКШ менен Канаданын жараны. 1992-2008-жылдары 16 жыл бою бир нече компанияны башкарган.
2014-жылы Кыргызстандын талабы менен козголгон кылмыш иштердин айынан эл аралык издөөгө алынган.
