БИШКЕК, 11-июн. — Sputnik. Жалал-Абад облусунун Ноокен районунда эки үй-бүлө "Хизб ут-Тахрир" экстремисттик тобунун курамынан чыкканын ИИМ билдирди.
Маалыматка ылайык, жарандар топтон баш тартканын айылдагы мечитте айыл аксакалдарынын алдында айтышкан.
ИИМ акыркы убакта Жалал-Абад облусунда түшүндүрүү иштеринин натыйжасында бул мыйзамсыз уюмдун мүчөлүгүнөн өз ыктыяры менен чыккандардын саны арбып баратканын белгилейт. Ноокен районунда да буга чейин үч жаран өз эрки менен экстремисттик уюмдан баш тарткан.
Ал эми былтыр Жалал-Абад облусунун аймагында жети адам бул мыйзамсыз уюмдан өз эрки менен чыкса, быйылкы жылдын башынан бери 12 адам салттуу ислам динине кайтканын билдирген.
