БИШКЕК, 11-июн. — Sputnik. Кыргызстандындын жаңы паспортунда улуту, үй-бүлөлүк абалы жана жашоо дарегин көрсөтүүчү үч графа алып салынышы мүмкүн. Бул тууралуу Sputnik Кыргызстан агенттигине Мамлекеттик каттоо кызматынын (МКК) төрага орун басары Дастан Догоев билдирди.
2015-жылдын аягында МКК төрагасы Тайырбек Сарпашев биометрикалык жаңы паспорттор кыргызстандыктарга 2016-жылдын экинчи жарымынан тарта бериле баштай турганын айткан.
Догоевдин айтымында, аталган үч графаны алып салуу жарандардын кайрылуусунун негизинде каралууда.
"Бул жарандын улуту, үй-бүлөлүк абалы жана жашоо дареги тууралуу маалымат таптакыр алып салынат дегендик эмес. Бардыгы электрондук форматка өткөрүлөт, башкача айтканда паспортто чип болот. Бул маалыматтар көзгө көрүнбөйт", — деди ал.
Мындан сырткары, жаңы паспорттор мурункудан сапаттуу материал — поликарбонат пайдаланылганы менен айырмаланмакчы.
"Материалдын өзүндө коргоочу элементтер болот. Сүрөт жайгаштырууда лазердик принтер колдонулат", — деди Догоев.
Эски үлгүдөгү паспортторду (ID-card) мөөнөтү аяктагыча пайдаланууга уруксат берилет.
