БИШКЕК, 9-июн. — Sputnik. Жогорку Кеңеште депутат Аида Салянова тарабынан өспүрүм кыздар менен никелешүүгө каршы демилгеленген мыйзам долбоору кайрадан каралып, колдоо тапты.
Эске сала кетсек, аталган мыйзам долбоору эл өкүлдөрү тарабынан буга чейин колдоо тапкан эмес.
Бул коомчулукта бир катар талкууну жаратып, депутаттардын мындай аракети сынга кабылган. Ал эми эл өкүлдөрүнүн бир даары мыйзам чийки болгону үчүн каршы болгонун айтса, кээси анын ордуна башка бирөө добуш берип койгонун билдирген. Кечээ, 8-июнда эл өкүлү Исхак Масалиев өтпөй калган мыйзам долбоорун кайрадан карап чыгуу демилгесин көтөргөн.
Аталган мыйзам долбооруна 69 депутат макул, 30 депутат каршы деп добуш берди.
Салянованын айтымында, жашы жете элек кыздар менен никелешүүгө бөгөт коюу алардын эркек тараптан зордук-зомбулукка кабылышынын алдын алат.
Сунушка ылайык өспүрүм менен никеге турган жаранды үч жылдан беш жылга чейин эркинен ажыратуу жазасы каралган.
