БИШКЕК, 8-июн. — Sputnik. Газ ташуучу автоунаанын жарылышынан оор жаракат алган жарандын экинчиси көз жумду. Бул тууралуу Sputnik Кыргызстан агенттигине Травматология жана ортопедия илим изилдөө борборунун башкы дарыгери Алмазбек Кубатбеков билдирди.
Буга чейин өрттөн жабыркагандардын бири каза болгону айтылган.
"47 жаштагы жабырлануучунун денеси 100 пайыз күйгөн эле. Жарааты өтө оор болгондуктан 15:40да каза болду", — деди Кубатбеков.
Белгилей кетсек, 6-июнда кечинде газ ташуучу автоунаа жарылып, андан жалпысынан 11 киши жабыркап, алтоо оор абалда ооруканага жеткирилген.
Буга чейин саламаттык сактоо министри Талант Батыралиев, Бишкек улуттук травматология жана ортопедия институтунун жетекчиси Сабырбек Жумабеков денеси күйүп калгандарга көп кан керектигин билдиришкен.
