БИШКЕК, 7-июн. — Sputnik. Кыргыз-тажик чек арасынан Тажикстан жаранын жардамы менен Сирияга кетүүгө камынган деген шек менен 18 жаштагы кыргызстандык кыз кармалды. Учурда тергөө иштери жүрүп, анын кандай жол жана ким аркылуу азгырылганы такталууда. Бул боюнча ИИМден билдиришти.
Кармалган кыздын Алай районунун тургуну, ал эми энеси Казакстандын Алматы шаарында, ал эми атасы Кыргызстанда экендиги маалымдалды. Кыргызстандык кыз энесинин жанында жүргөндө Астана шаарында тажикстандык жаран менен таанышып, аны менен Кыргызстанга келгенден кийин да интернет аркылуу байланышып турган.
Милициянын маалыматына караганда тажикстандык жаран кызды Афганистан аркылуу Сирияга алып кетүүнү максат кылган. Ал тааныштары аркылуу кызга акча берип жиберген учурлары айтылууда.
"Учурда тергөө иштери жүрүп жатат. Ким аркылуу таанышкан, кандай жол менен кандай жагдайда азгырылганы, дагы бир катар жагдайлар такталууда", — деп билдиришти аталган министрликтен.
ИИМдин буга чейинки берген маалыматында Кыргызстандан Сирияга кеткендердин саны 500гө чамалап калгандыгын, 300ү түштүк аймактан кеткендигин, алардын ичинен аялдардын саны жүздөн ашкандыгын билдирген.
