БИШКЕК, 7-июн. —Sputnik. Кечээ, 6-июнь күнү Бишкектин Фучик көчөсүндө газ ташуучу унаа жарылып чыккан өрт боюнча кылмыш иши козголду. Бул тууралуу ИИМ билдирди.
Эскерте кетсек, кечинде болгон кырсыктан тогуз адам ооруканага жаткырылып, анын алтоосунун абалы оор экени айтылууда. Жабыркагандардын арасында 12 жаштагы өспүрүм да бар.
Алдын ала маалыматтар боюнча өрт коопсуздук техникасы сакталбаганынан улам, газды бир унаадан экинчи машинага сордуруп куюштуруп жатканда чыккан. Жалын ошол аймакта турган дагы үч унаага жайылып кеткен. Натыйжада беш жүк ташуучу унаа күйүп кетти.
Учурда аталган факты боюнча Кылмыш жаза кодексинин 176-беренесинин (этиятсыздыктан улам мүлктү жабыркатуу же жок кылуу) негизинде кылмыш иши козголду. Тергөө иштери башталып, бардык тийиштүү экспертизалар дайындалды.
