БИШКЕК, 2-июн. — Sputnik. Жогорку Кеңештин депутаты Камчыбек Жолдошбаев ар кандай маселелер каралып жаткан маалда кесиптештерине "колбасаны байкап жеп жүргүлө" деген сунушун берди.
Анын айтымына караганда Ош базардын аймагында санитардык нормаларга жооп бербеген эт азыктары сатылууда.
"Депутаттар, баарыңар эле колбаса жесеңер керек. Мындан ары байкап жеп жүргүлө. Себеби базарда эттин баасы 300 сом, колбасанын баасы 280 сом. Кантип эле ушундай болсун? Карайган этти 60-70 сомдон сатып жатышат. Колбасалар ошол эттен жасалып жүрбөсүн. Ал кандай эт экени белгисиз. Чоң адамдар жесе жесин, а бирок балдар эмне болот?", — деп суроо салды Жолдошбаев.
Ал колбасалар халал деп аталганы менен сапаты начар болгондуктан аларды коңшу өлкөлөр сатып албай келерин кошумчалады.
