БИШКЕК, 27-май — Sputnik. "Казакстан" телекомпаниясынын "Айтууга оңой" программасынын жардамы менен 12 жылдан бери изделип жаткан кыргыз жигит табылды. Бул тууралуу Тышкы иштер министрлиги билдирди.
Маалыматка ылайык, эс-тутуму начар болуп, амнезия илдетинен жабыркаган Асан Арыкбаев социалдык тармак аркылуу программага жардам сурап кайрылган. Телеканал аркылуу издөө жарыяланганда Казакстан жана Өзбекстандан бир канча үй-бүлө чыгып, Асан Арыкбаевдин туугандары экенин айтышкан. Бирок ДНК анализдери башка жыйынтык көрсөткөн.
Журналисттердин талыкпаган эмгеги үзүрүн берип, Арыкбаевдин апасы Кыргызстандан табылган. Медициналык текшерүү аталган маалыматты тастыктаган корутунду чыгарып берген.
Баланын энесин табууга Алматы шаарындагы Кыргызстандын элчилиги, КРдин Тышкы иштер министрлигинин түштүктөгү өкүлчүлүгү жардам көрсөткөн.
