БИШКЕК, 27-май — Sputnik. Бейшемби күнү Ош шаарында 9-11-класстардын 6,5 миң бүтүрүүчүсү үчүн акыркы коңгуроо кагылды.
Ош шаарынын билим берүү башкармалыгынын жетекчиси Куштарбек Кимсановдун берген маалыматына караганда Ош шаары боюнча 58,7 миң мектеп окуучусу бар. Алардын ичинен 4 миң 273ү 9-класстын, 2 миң 314ү 11-класстын бүтүрүүчүлөрү болуп эсептелет.
"Шаардын мектеп окуучулары аймактык жана республикалык деңгээлдеги олимпиадаларда жакшы жыйынтыктарды көрсөтүшкөн. Мындан тышкары, коомдук иштерге да активдүү катышат", — деп билдирди Кимсанов.
"Олимп" мектеп-гимназиясынын бүтүрүүчүлөрү бий боюнча флеш-моб уюштуруп, мектеп тууралуу ырларды ырдашты. Мугалимдерге ыраазычылык айтуу менен абага шарларды учурушту.
Акыркы коңгуроого арналган салтанаттуу иш-чара №12 мектептеги мүмкүнчүлүгү чектелген бүтүрүүчүлөр үчүн дагы өткөрүлдү. 8-класстын бүтүрүүчүлөрү мугалимдерине мектеп вальсын бийлеп беришти.
