БИШКЕК, 16-май — Sputnik. "Жеткиликтүү турак жай – 2015-2020" программасын ишке ашырууга 3 миллиард 700 миллион сом тартыла турганын Каржы министри Адылбек Касымалиев Жогорку Кеӊештин Бюджет жана финансы боюнча комитетинде билдирди. Бул тууралуу парламенттин маалымат кызматы кабарлады.
Касымалиевдин айтымында, бул программаны ишке ашыруунун алкагында ар бирин 5 жылдык мөөнөт менен наркы миӊ сомдук мамлекеттик казыналык облигациялар чыгарылып, ал Мамлекеттик ипотекалык компанияга 10 жылдык мөөнөт менен ссуда катары берилет. 3,7 миллиард сом 2500 кардардын турак жай алуусу үчүн насыя катары берүүгө жетет.
Мамлекеттик ипотекалык компаниянын маалыматына караганда, ушу тапта 17 миллион сом өлчөмүндөгү каражат 21 кардарга жеӊилдетилген насыя катары берилди. Алар 185 кардардын ичинен тандалып алынган.
