БИШКЕК, 12-май — Sputnik. Илимдин кандидаты жана илимдин доктору даражасына ээ жогорку билимдүү мугалимдер 1-майдан тарта академиялык магистр даражасы бар окутуучулар үчүн каралган айлык акы ала баштайт. Бул туурасында Билим берүү жана илим министрлиги билдирди.
Эскерте кетсек, мугалимдерге айлык анын билим деңгээлине карата саатына төлөнөт. Министрлик 1-майдан тарта маяна окутуучулардын кайрылуусунун негизинде жогорулатылганын белгиледи.
"Окуу жылынын башында мугалимдердин айлык акысын 50 жана 80 пайызга жогорулатып жатканда "советтик диплому" бар жана илимий даражасы бар мугалимдер алардын маянасын магистр деңгээли менен көрсөтүүнү суранышкан", — деп айтылат билдирүүдө.
Министрлик кайрылуудан кийин "Билим берүү жөнүндө" мыйзамына өзгөртүү киргизүүнү демилгелеген. Учурда мыйзам долбоор өкмөттө макулдашуудан өтүүдө, андан соң парламенттин кароосуна жиберилет.
"Ушу тапта өкмөттүн деңгээлинде илимий даражасы бар мугалимдердин ставкасын жогорулатуу чечими кабыл алынды", — деди билим берүү жана илим министри Элвира Сариева.
