БИШКЕК, 14-май — Sputnik. Премьер-министр Сооронбай Жээнбеков кыргызстандыктарды Энелер күнү менен куттуктап жатып аялзатынын бекем ден соолугу мамлекеттин келечеги экенин баса белгиледи. Бул тууралуу өкмөттүн маалымат кызматы билдирди.
Анын айтымында, бул күн энелердин ыйыктыгын жана асылдыгын дагы бир ирет далилдеп, баалоого мүмкүндүк түзөт.
"Энелердин, деги эле аялзатынын бекем ден соолугу — бул мамлекетибиздин байлыгы, келечеги. Өкмөт кабыл алып жаткан чечимдердин көбүн эне менен баланын бакубаттулугун камсыздоого багыттоо — негизги милдетибиз", — деди өкмөт башчы.
Жээнбеков бардык энелерге чың ден-соолук, үй-бүлөлүк бакыт, кең келечек каалады.
"Урматтуу биздин апалар! Сиздер бар, биз барбыз. Жашооңуздарда кубанычтуу, берекелүү күндөр көп болсун! Уул-кыз, небере-чөбөрөнүн камкордугунда алардын жакшылыгына, ийгилигине күбө болуп, узак өмүр сүрүшүңүздөргө тилектешмин", — деди Жээнбеков.
Энелер күнүнө карата бүгүн президент Алмазбек Атамбаевдин Жарлыгы менен 1902 энени "Баатыр эне" ордени жана алты баланы тарбиялап жаткан 437 аял "Эне даңкы" медалы менен сыйланышты.
