БИШКЕК, 13-май — Sputnik. Айрым маселелер чечилбегендиктен Тажикстан менен чек ара боюнча макулдашууларга кол коюлбай жатат. Бул тууралуу өкмөттүн чек ара маселеси боюнча атайын өкүлү Курбанбай Искандаров маалымат жыйында билдирди.
2015-жылдын жыйынтыгы боюнча Алмазбек Атамбаев журналисттердин суроолоруна жооп бери жатып, үстүбүздөгү жылдын май айында Тажикстан менен чек ара боюнча макулдашууларга кол коюларын айткан.
Искандаров эки өлкө ортосунда кээ бир такталбаган маселелер чечилбей жатканын билдирди.
"Биз Тажикстан менен байма-бай сүйлөшүүлөрдү жүргүзүп жатабыз. Азырынча бир тыянакка келе элекпиз. Качан макулдашууларга чекит коюларын айтуу кыйын", — деди Искандаров.
Ал тиешелүү документтер даяр экенин айтып, укуктук маселе чечилбей жатканын кошумчалады.
"Бир тыянакка келерибиз менен жар салабыз. Азырынча болгон маалымат ушул", — деди адис.
Тажикстан менен Кыргызстандын чек ара тилкесинин узундугу 970,8 чакырымды түзөт. Чак аранын 520 чакырымы такталып, калганы талаш бойдон калууда.
