БИШКЕК, 12-май — Sputnik. Youtube сайтында Mirco Crocop аттуу колдонуучу "Элдик парламенттин" өкүлдөрү делинген кишилердин бийликти басып алууга аракет кылган сүйлөшүүлөрүн жарыялады.
Ал эми УКМКнын маалымат кызматы "Элдик парламенттин" үч өкүлү кармалып келгенин билдирип, аттарын атаган эмес. Аларга карата Кылмыш жаза кодексинин "бийликти күч менен тартып алууга даярдык көрүү" жана "бийлик адамына карата зомбулук кылууга даярдануу" беренелери боюнча айып тагылып, кылмыш иши козголгонун билдирген.
Интернетте жарыяланган аудио жазууда "Элдик парламенттин" лидери делинген Төрөбай Колубаев аттуу жарандын бейтааныш киши менен сүйлөшүп жатканы жазылган. Колубаев митинг боло турчу күндү, кишилердин санын жана бейөкмөт уюмдарын чакыруу боюнча айтат.
Ошондой эле Колубаев болушу мүмкүн делген киши УКМКнын жетекчиси Адил Сегизбаевдин көзүн чукуп, колу-бутун сындыра турганын да айткан. Аудио жазуунун узактыгы 52 секунд.
Дагы башка видеодо аталган бирикменин лидерлеринин бири Бекболот Талгарбеков болушу мүмкүн деген кишинин үнү жазылган. Анда Талгарбеков бейтааныш киши менен сүйлөшүп, маалымат жыйынын ийгиликтүү өткөрүп алганын, эми мындан кийинки кадамдары кандай болорун, президентти отставкага кетирип, анын артынан өкмөт да кетерин айтат. Ошондой эле алардын жыйыны тууралуу маалыматтар Европадагы сайттарга чейин чыкканын билдирет.
Белгилек кетсек, буга чейин ушундай эле шек менен оппозиция өкүлдөрү Бектур Асанов, Кубанычбек Кадыров, Эрнест Карыпбеков жана Дастан Сарыгулов (үй камагында) кармалган. Сот аларды 12-июлга чейин камакта калтыруу чечимин кабыл алган.
