Бектур Асанов менен Кубанычбек Кадыров 12-июлга чейин камакта калтырылды

БИШКЕК, 10-май — Sputnik. Бишкек шаарынын Биринчи Май райондук соту бийликти басып алууга шектелген оппозиция өкүлдөрү — Бектур Асанов, Кубаныбек Кадыровду 12-июлга чейин камакта калтыруу чечимин кабыл алды. Бул тууралуу Бектур Асановдун жактоочусу Разак Ашымбаев Sputnik Кыргызстан маалымат агенттигине билдирди.

21-мартта Интернетте Кубанычбек Кадыров, Дуулатбек Турдуналиев менен Бектур Асановдун бийликти басып алуу боюнча сүйлөшкөн делген видеосу тараган. Анда алар бийликти басып алуунун жолдорун жана акчаны бөлүштүрүүнү талкуулашкан. Бирок оппозиция өкүлдөрү аталган видео монтаж экенин билдиришкен. Аларга карата Кылмыш жаза кодексинин 295-беренеси (Бийликти күч менен басып алууга даярдык көрүү) боюнча кылмыш иши козголгон.

Белгилей кетсек, 24-мартта Кубанычбек Кадыров менен Бектур Асановду УКМК кызматкерлери кармап кеткен. Алар 12-майга чейин камакка алынган болчу.

Ашымбаевдин айтымында,Биринчи Май райондук соту ишти 7-майда караган.

"Сот иши жабык түрүндө өтүп, эч кимди киргизген жок. Бизди темир тосмодон ары өткөрбөй коюшту. Сот тергөө жүрүп жатканына байланыштуу деп аларды 12-июлга чейин камакта калтырды", — дейт жактоочу.

Ал ошондой эле аудиодогу үн Бектур Асановдуку экенин аныктоо боюнча дайындалган экспертизанын жыйынтыгы чыга электигин кошумчалады.

Бийликти басып алууга шектелгендердин катарындагы Дастан Сарыгуловду да 12-июлга чейин үй камагында калтыруу чечими кабыл алынганын коомдук ишмер өзү Sputnik Кыргызстан маалымат агенттигине ырастады.