БИШКЕК, 11-май — Sputnik. Жогорку Кеңештин депутаты Дастан Бекешов соттолгондордун электрондук базасын түзүү боюнча мыйзам долбоорун сунуштап, ал коомдук талкууга коюлду.
Анын айтымында, маалыматтык базада соттолгон адамдын фамилиясы, аты, атасынын аты, туулган жылы жана ал жоопкерчиликке тартылган беренеси көрсөтүлүүгө тийиш. Бул база иш берүүчүгө аны өз алдынча текшерүүгө мүмкүндүк берет.
"Жарандар жумушка орношууда Ички иштер министрлигинен соттолбогондугу тууралуу маалымдама алуусу керектелсе, бул көрүнүш жоюлуп, жарандар убактысын жана чыгымын үнөмдөйт. Учурда ар бир жаран кылмыш жасабагандыгын далилдеши керек. Бул милдет иш жүзүндө күнөөсүздүк принцибин "жокко" чыгарат. Сунуштун ишке кириши менен бул көрүнүш да жоюлат", — деди Бекешов.
Ал долбоор администрациялык жол-жоболорду кыскартуу жана айрым документтерди алуу шарттарын жөнөкөйлөтүү максатында иштелип чыкканын кошумчалады.
"Мыйзам долбоору кандайдыр бир коррупциялык кесепеттерге алып келбейт. Тескерисинче, адамдын соттолгондук статусун айкындоонун ачык жана жеткиликтүү механизмдерин камсыз кылат", — дейт депутат.
Бекешовдун айтымында, электрондук базаны өкмөт көзөмөлгө алышы керек. Маалымдама алууда каалаган жаран ыйгарым укуктуу бөлүмгө кат түрүндө кайрылып, үч күн ичинде жооп алуусу зарыл.
"Укук коргоо кызматында соттолгондор тууралуу өзүнчө тизме бар. Ошону кайталоо болуп саналат. Азыркы депутаттар эмне кылышты билбей, оюна келгенди жасап жатат. Мындан сырткары ар бир адам тууралуу кеңири маалымат Мамлекеттик каттоо кызматында бар. Керек болсо манжалардын маалыматтарын да тапшырдык. Бул мыйзам өлкөнү алдыга сүрөбөйт. Депутат үчүн мыйзам жазды деген гана аты калат", — деди Исаков.
Ал эми мурунку юстиция министри, учурдагы депутат Алмамбет Шыкмаматов документтерди электрондоштуруу учур талабы экенин белгилейт.
"Мамлекеттеги бардык тизмектерди электрондоштуруу жүрүп жаткан соң бул сунушту колдойм. Жөнөкөй жарандар маалымдама алуу үчүн эшиктерди каккылап жүрбөшү керек. Бул заманбап технология. Эски телефонду жаңысына алмаштыргандай эле кеп", — деди Шыкмаматов.
Ал ортодо депутат Иса Өмүркулов бул сунуш адамдардын конституциялык укуктарын бузуп, жеке жашоосуна кийлигишүү болуп саналат деген ойдо.
Ички иштер министрлиги өлкө аймагында сот жообуна тартылбагандыгы жөнүндө маалым катты жарандардан акы алып анан берет. Акча каражаттары тездик үчүн төлөнөт.
КРдин өкмөтүнө караштуу Монополияга каршы жөнгө салуу мамлекеттик агенттигинин бекиткен тарифине ылайык, үч күн ичинде маалымат берүү — 170 сом, бир күн ичинде берүү — 220 сомду түзөт. Ал эми акысыз алууну каалгандар 10 күн күтүүсү керек.
2014-жылдын жана 2015-жылдын 9 айынын ичинде соттолгон-соттолбогону жөнүндө маалымдама алууга арыз менен 118 миң 471 жаран кайрылган.
Акы төлөп кызмат көрсөтүүдөн 10 млн 940 миң сомдон ашык каражат түшкөн. ИИМдин маалыматы боюнча каражат чарбалык максаттарга жумшалат.
