БИШКЕК, 29-апр. — Sputnik. Президент Алмазбек Атамбаевдин кабыл алуусунда болгон Өзгөчө кырдаалдар министри Кубатбек Боронов кырсыктуу жерлер боюнча элге эскертүү мурда эле жасалганын билдирди. Бул туурасында президенттин маалымат кызматы кабарлады.
Президент Атамбаев Өзгөчө кырдаалдар министрин кабыл алып, Сузактагы Кызыл-Туу айылынын эки тилкесинин жашоочуларынын коопсуздугун камсыздоо боюнча маалымат алды.
Президент Өзгөчө кырдаалдар министрлиги калк арасында түшүндүрүү иштерин күчөтүүсү тийиш экенин белгиледи. Атамбаев куткаруучулар жана жергиликтүү өз алдынча башкаруу органдары жаратылыштын ар кандай кырсыктарына кириптер аймактардын жашоочуларынын коопсуздугун камсыз кылуу үчүн бардык аракеттерди көрүшү зарыл экенин айтты.
27-апрелде кечинде саат 18.00дөр чамасында болжол менен көлөмү 1 миллион 600 миң куб метр жер көчкүсү жүрүп, алты турак жайды жана 16 жашар баланы басып калган. Анын сөөгү 28-апрелде түштөн кийин топурактын алдынан табылып, ата-энесине өткөрүп берилди.
