БИШКЕК, 27-апр. — Sputnik. Жалал-Абад облусунун Сузак районунда кечке жуук эки жер көчкү катталды. Саат 18.00дөр чамасында райондун Башы тилкесинде болжол менен 1 миллион 600 миң куб метр жер көчкүсү жүрүп, алты турак жайды жана 14 жашар баланы басып калган. Бул тууралуу ӨКМдин маалымат кызматы билдирди.
Сузак районунун Алмалуу-Булак айылында түшкөн жер көчкү
© пресс-служба МЧС КР
Алдын ала маалымат боюнча балдардын бирөө качып чыгууга үлгүрсө, экинчиси жетишпей калган.
ӨКМден маалымдашкандай жарым саат мурун 17:30 чамасында Алмалуу-Булак айылынын Үч-Чат жайлоосунда 100 миң кубметр жер көчкү түшүп, бир үйдү басып калган.
Издөө иштери жүрүп, ага төрт куткаруучу, ӨКМдин куткаруу отрядынан 22 куткаруучу чыгып кетти.
Министр Кубатбек Бороновдун тапшырмасы менен анын орун басары Равшан Рысбаев кырсык болгон жерде издөө-куткаруу иштерине жетекчилик кылып жүрөт.
Белгилей кетсек, буга чейин да Жалал-Абад облусунун аймагында бир нече жолу жер көчүп, сел жүргөн.
