БИШКЕК, 29-апр. — Sputnik. Чүйдүн Ысык-Ата менен Аламүдүн райондорунда жыйырма үйдөн экстремисттик маанайдагы адабияттар табылды. Бул туурасында ИИМдин маалыматы кызматы кабарлады.
ИИМдин 10-Башкы башкармалыгы менен Чүй облустук ИИББдин 10-башкармалыгы тарабынан экстремисттик маанайдагы иштердин алдын алуу, табуу максатында ыкчам-издөө операциясы жүргүзүлгөн.
"Жыйырма үйдөн 2 500 китеп, 600 колдонмо, 5 300 дисктер, төрт ноутбук, жети флешкарт жана бир курал табылган", — деп кабарлады маалымат кызматы.
Табылган адабияттар боюнча теологиялык экспертиза жүргүзүлүп, 44 китеп боюнча эксперттик жыйынтык чыгарылган. Адистер бул экстремисттик маанайда деген бүтүм чыгарып беришкен. Анын негизинде Кылмыш кодексинин 299-беренеси менен (Улут, раса, дин жана аймак аралык касчылыкты козгоо) кылмыш иши козголду.
Маалымат кызматы табылган калган материалдарга да эксперттик анализ жүргүзүлүп жаткандыгын кошумчалады.
