БИШКЕК, 20-апр — Sputnik. Бишкек шаарынын 138 жылдыгына карата кандай майрамдык иш-чаралар дайындалып жатканын Sputnik Кыргызстан агенттигине Бишкек мэриясынан билдиришти.
Бишкек шаардык кеңешинин токтому менен шаар күнү 29-апрелде белгиленмей болгон.
10.00. Майрам "Көк-Жар" конушунда бала бакчанын ачылышы менен башталат. Иш-чара Бишкек шаарынын мэри Албек Ибраимов менен шаардык кеңештин спикери Алмаз Кененбаевдин катышуусунда өтөт. Ушундай эле жаңы имарат Свердлов районуна караштуу Кайынды конушунда ачылат.
11.00 – 16.00. Фучик сейил багында, филармониядагы жаштар аллеясында жана Жаш гвардия проспектисинде спорттук иш-чаралар уюштурулат.
14.00. Абдылас Малдыбаев атындагы мамлекеттик опера жана балет театрында №6 окуу-тарбиялык комплексинин 80-жылдыгына карата салтанаттуу иш-чаранын өтүшү пландалууда.
15.00 — 18.00. Студенттер менен жогорку класс окуучуларынын катышуусундагы концерт Курманжан Датка эстелигинин жанында болот.
Мындан сырткары, бардык төрт райондогу сейил бактарда эл үчүн ар кандай майрамдык шаан-шөкөттөр уюштурулат.
