БИШКЕК,16-апр. — Sputnik. Тажикстандык кесиптештер менен кылмыш дүйнөсүнө каршы биргеликте күрөшөбүз. Бул тууралуу Кыргызстан менен Тажикстандын ички иштер министрлеринин жолугушуусун жыйынтыктап жатып ИИМ башчысы Мелис Турганбаев айтты.
Турганбаев эки өлкөнүн аталган министрликтеринин ортосундагы ишеничтүү карым-катнаш чек ара аймактарындагы коопсуздукту тартипке келтирүүдө жана кылмыш дүйнөсү менен күрөшүүгө салымын кошорун белгиледи.
"Иш-чара ички иштер органдары үчүн абдан маанилүү болду. Мени таң калтырганы —биздин маселелер окшош экен. Дагы бир жолу баса белгилеп өтөйүн, Кыргызстан менен Тажикстандын чек ара аймактарында коопсуздукту сактоо боюнча кызматташтыкты бекемдешибиз кажет", — деди министр.
Ал аталган иш-чара өз максатына жеткенине токтолуп, эки мекеменин ортосунда достук мамиле чыңдалганын айтты.
"Бири-бирибиз менен жакындан таанышып, бир үй-бүлө сыяктуу болуп калдык. Чек ара аймагында жашаган калктын коопсуздугун камсыз кылып, кылмыш дүйнөсү менен чогуу күрөшөбүз, — деди Турганбаев.
Министр кыргыз милиционерлери тажик кесиптештерге жардам берүүгө даяр экенин белгилеп, тажрыйба алмашуу менен реформа жүргүзүүгө боло турганын кошумчалады.
Муну менен бирге Турганбаев аталган коллегияда кабыл алынган чечимдердин жыйынтыгын билүү үчүн кийинки жылы Кыргызстанда жолугушуу өткөрүүнү сунуштады.
