БИШКЕК, 12-апр.—Sputnik. Онкологиялык ооруга чалдыккандардын ичинен никелүү түгөйлөр ооруну жеңүү мүмкүнчүлүктөрү жогору экенин Сан-Диегодогу Калифорния университетинин окумуштуулары билдиргенин РИА Новости жазып чыкты.
Докладдын авторлору илимий изилдөөгө Калифорния штатындагы оорулуулардын маалыматтары колдонулганын айтышат. Анда рактын ар кандай түрлөрү менен ооруган 800 миңге жакын жаран изилдөөгө алынган.
2000-09-жылдар аралыгында рак оорусуна кабылгандарды окумуштуулар 2012-жылга чейин көзөмөлгө алышкан.
"Биздин божомол боюнча оорулуу адам үчүн экономикалык абалдан мурун социалдык колдоо кыйла маанилүү",— деген изилдөөгө катышкан окумуштуу Мария Елена Мартинестин мындай пикирин The Guardian гезити жазып чыкты.
Онкологиялык ооруга кабылган бойдок жигиттер үчүн коркунуч 24 пайызга жогору болсо, турмушка чыга элек кыздардыкы 17 пайызды түзгөн.
Эми окумуштуулардын алдында никенин артыкчылыгын аныктоо тапшырмасы турат.
"Мындай өзгөчөлүк социалдык колдоого байланыштуу болушу ыктымал. Мисалы, түгөйлөр депрессиядан чыгууга жардам берип, дарыгерге көрүнүүнү сунуштап же жок дегенде дарыны убагында ичүүнү эскертип турушат эмеспи",— дейт окумуштуу Мария Елена Мартинес.
Окумуштуу мындай изилдөө адамдар үчүн жакын адамдардын колдоосу канчалык маанилүү экенин көрсөтөрүн кошумчалайт.
