БИШКЕК, 11-апр. — Sputnik. Кытайдын дарыгерлери ашыкча салмак менен жабыр тарткандар үчүн өлкөдө биринчи ирет колдонмо иштеп чыкты. Бул туурасында РИА Новости China Daily басылмасынын маалыматына таянып жазды.
Бул кеп-кеңешти Кытай дарыгерлер ассоциациясы баштаган бир топ медициналык уюмдар биргелешип иштеп чыккан. Ага 100гө чукул адис катышып, даярдоого бир жылга чукул убакыт кеткен.
2016-жылы сынамык программа 20 шаардын 39 ооруканасына иштеп баштап, семиздиктен жапа чеккендер кайрылып, биринчи кеп-кеңештерди алууга шарт түзүлгөн. Кытай бийлиги аталган программаны башка ооруканаларга жайылтууну пландап жатат.
Кытайдын Саламаттык сактоо жана балдардын төрөлүшүн пландоо боюнча комитетинин маалыматында 2015-жылдын аягында Кытайда 18 жашка чейинки балдардын 30 пайызы ашыкча салмактан жапа чегээри айтылган. Бул көрсөткүч өнүккөн өлкөлөргө салыштырмалуу тез темп менен өсүп бараткандыгы айтылат.
