БИШКЕК, 11-апр. — Sputnik. Дүйнөлүк футбол ассоциациясынын инструкторлору кыргызстандык калыстар үчүн окуу курсун өткөрүп жатканын Футбол федерациясы билдирди.
Маалыматка ылайык, курс 8-12-апрель күндөрү аталган федерациянын футбол борборунда өтүүдө. Иш-чарага 30 калыс катышып жатат, анын үчөө — FIFA арбитрлери, бешөө — ФИФА калыстарынын ассистенттери.
Мында курсту Эл аралык футбол уюму менен Азия футбол конфедерациясынын тажрыйбалуу адистери Фархат Абдуллаев жана Али Ахмед Аль-Траифи өтүп жатышат.
Абдуллаевдин айтымында, мындай иш-чара биринчи ирет өтүп, калыстын ишмердүүлүгү ийне-жибине чейин талкууланууда.
Курстун жыйынтыгы менен экзаменди ийгиликтүү тапшыргандарга сертификат тапшырылып, бул улуттук жана эл аралык деңгээлдеги беттешүүлөрдү тейлөөгө жол ачат.
