БИШКЕК, 4-апр. — Sputnik. Насвайды өндүргөндөргө жана саткандарга жаза колдонуу боюнча мыйзам долбоорун депутат Махабат Мавлянова коомдук талкууга алып чыкты.
Ага ылайык, насвайды өндүргөн жана саткандарга карата административдик жаза колдонулуп, жарандарга беш миң сом, юридикалык жактар 50 миң сом айып салынат. Эгерде кылмыш аракеттери кайталана турган болсо айып пулдун көрсөткүчү өсүп, жарандар 10 миң сом, юридикалык жактар 90 миң сом айыпка жыгылат.
Мындан сырткары мыйзам долбоорунда коомдук жайда тамеки тарткандарга карата жазаны көбөйтүү каралган, жарандарга айып пул буга чейин 500 сом болсо эми 1000 сом, мамлекетик кызматкерлерге жаза 1000 сомдон 3000 сомго чейин каралган.
