БИШКЕК, 3-апр. — Sputnik. Түркиянын президенти Режеп Тайип Эрдоган бийлик сөз эркиндигине каршы аракеттерди жасабай турганын, болгону ЖМК өкүлдөрүнүн мыйзамсыз аракеттерине карата чараларды көрүп жатканын билдирди.
Ал CNN каналына интервью берип жатып, журналисттин "өлкөдө реформа жасаган киши катары кадырыңыз болуп туруп, ЖМКга каршы эмнеге "согуш" баштадыңыз?" деген суроосуна "ЖМКга эч ким согуш жарыялабаганын" билдирди.
"Мен ЖМК менен согуша турчу жагдайда эмесмин. Биз ЖМК менен болгон согуш деген эмне экенин белгилеп алышыбыз керек. Эгер гезиттин журналисти же жетекчиси мамлекеттин сырларын ачып, дүйнөгө жар сала турган болсо, анын арты иликтөөлөр менен бүтөт. Мыйзамсыз аракеттердин баасы болот. Бардык мамлекетте ушундай", — деген жообун берген.
Буга чейин АКШнын мамлекеттик департаментинин өкүлү Жон Кирби Американын Түркия менен болгон мамилеси сөз эркиндигинин айланасында болуп жаткан окуялардан улам "туура эмес" багытта өнүгүп жатканын билдирген. Ал мындай пикирин Стамбулдун соту өлкөдөгү ири гезиттердин бири Zaman гезитине сыртынын камкорчулар дайындалып, ал "басып" алынганда айткан. Аталган гезиттин имаратына жаңы камкорчулар полициянын күчү менен кирген.
