БИШКЕК, 31-мар. — Sputnik. Борбор калаада ИИМ кызматкерлеринин арасында ок атуучу куралдар жана кызматтык көп түрлүү спорт боюнча өткөн чемпионатта Жалал-Абад ОИИБдин курама командасы жалпы топтогон упай боюнча 1-орунду ээледи. Милиционер кыздар эркектерден кем калышпагандыгын көрсөттү. Бул туурасында аталган Жалал-Абад ОИИБдин маалымат кызматы кабарлады.
Мелдеш аялдар жана эркектер арасында өтүп, ага 14 команда катышты.
Жалпы упайлардан сырткары Жалал-Абаддык милиционерлер автомат менен тапанчаны мыкты атарын көрсөтүшкөн.
"Эркектер арасынан автомат атууда 1-орунду Жалал-Абад ОИИБдин нөөмөт бөлүмүнүн кызматкери, майор Нурдин Жээнтаев багындырды. Ал эми тапанча атуудагы мыкты көрсөткүчү менен 1-орунду Сузак РИИБдин тергөөчүсү, милициянын лейтенанты Мурат Нарбаев ээледи", — деп кабарлады маалымат кызматы.
Андан сырткары, кыздардан 14 команданын ичинен Токтогул РИИБдин өкүлү Айпери Анарбекова кичи калибрлүү жана Жалал-Абад облустук ИБден Бегайым Мурзаева тапанча атуу боюнча 4-орунду ээлешти.
Бүгүн Ички иштер министринин орун басары Курсан Асанов мелдеште артыкчылык көрсөткөндөрдү сыйлады.
Бул чемпионат ок атуу боюнча 1980-жылда Москва шаарында өткөн олимпиаданын чемпиону болгон Александр Мелентьевдин жаркын элесине арналып, эки жылдан бери өткөрүлүп келет.
