БИШКЕК, 2-дек. — Sputnik. Жалал-Абад ОИИБ Сузак айылындагы террорчулар барымтага алган №2 "Домата" орто мектебинин окуучулары менен мугалимдерин "куткарып" чыгышты.
Бүгүн кыргыз өкмөтүнүн Жалал-Абаддагы ыйгарым укуктуу өкүлчүлүгүнүн жетекчилиги менен УКМК, облустук ИИБ баштаган күч органдарынын "Антитеррор-2015" деп аталган аскердик машыгуусунун 2-этабы өтүп, анда болжолдуу сценарий боюнча террорчулардын колунда калган окуучулар менен мугалимдер бошотулду.
Атайын операцияга облустук ИИБ ыкчам аракеттенүү отряды, ИИМдин атайын багыттагы бөлүгү, кинологдор, райондук милициянын тергөө тобу, УКМКнын облустук жана райондук кызматкерлери, Улуттук Гвардиянын аскерлери, саперлору, өрт өчүргүчтөр, тез жардам кызматы баштаган топ катышты. Машыгууга жергиликтүү тургундар, билим берүү кызматкерлери, ИИМдин ардагерлери, элдик кошуундун мүчөлөрү болуп жалпысынан 1,5 миңге жакын адам күбө болду.
"Антитеррор-2015" аскердик машыгуунун алгачкы этабы 21-ноябрда өткөн. Анда миңге чукул адам катышкан аскердик жүрүш болуп, ок атуу талаасында машыгуу, спорттук мелдештер менен коштолгон.
