БИШКЕК, 29-мар. — Sputnik. Биринчи класстын окуучусу Даниэлди өлтүрдү деп шектелип жаткан жаран күнөөсүн моюндабаганын Биринчи Май райондук сотунун залынан кабарчыбыз билдирди.
2015-жылы 10-декабрда Бишкек шаарынан 7 жаштагы Даниэл жоголгон. Ал мектепке бараткан кезде "апаң жиберди" деп Майрам Акунова аттуу аял алдап, наристени автобуска салып Сокулук районунун Күн-Туу айылына алып кеткени айтылган.
Ал жерден димедрол аралашкан суусундук берген. Бала эс учун билбей жыгылып калганда аны муунтуп өлтүргөн деп шектелүүдө.
"Мени жасабаган нерсемди жасадың деп мажбурлап туруп моюнга алдырышкан. Мен баланы өлтүргөн эмесмин", — дейт шектелип жаткан Майрам Акунова.
Соттун "ким мажбурларды" деген суроосуна ал так жооп бере алган жок.
