Кыргызстанда элди отун менен камсыз кылуу үчүн бактар отургузулат

© Sputnik / Александр Кондратюк / Медиабанкка өтүүОтун даярдоо. Архив
Отун даярдоо. Архив - Sputnik Кыргызстан
Жазылуу
Быйыл өлкө боюнча 2 миллион көчөт отургузуу пландаштырылган.

БИШКЕК, 22-мар. — Sputnik. Айлана-чөйрөнү коргоо жана токой чарбасы боюнча мамлекеттик агенттик калкты отун менен камсыз кылуу максатында атайлаштырылган токойлор пайда боло турганын билдирди.

Агенттиктин өкүлү Бакыт Ырсалиев мында бактардын тез өсүүчү түрү отургузуларын белгиледи.

"Калктын саны көбөйүп, отунга болгон муктаждык да барган сайын өсүп жатат. Тез өсүүчү бактарды отун жана курулуш материалдары катары пайдаланууга болот", — деди ал. 

Ырсалиевдин айтымында, токойлордун аянтын кеңейтүү үчүн агенттик көчөттөрдү 10-25 гектар жерлерге отургузат. Мындан тышкары, өкмөт быйыл 2 миллион көчөт отургузууну пландаштырууда.

Ырсалиев көчөттөрдү отургузган эл анын сугаруу маселесин көп учурда көңүл сыртында калтырарын айтып өттү.

"Биз ар бир айыл аймагы, райондун борбору тиккен көчөттөрү үчүн жооп берүүсүн сунуштап жатабыз", — деди ал.

Мындан тышкары, ал Бишкекти жашылдандыруу иштерине Республикалык жаратылышты сактоо фондусунан 6 миллион сом бөлүнгөнүн кошумчалады.

Жаңылыктар түрмөгү
0