БИШКЕК, 20-мар. — Sputnik. Аксы районундагы кыргыз-өзбек чек арасынын Чаласарт аймагында абал тынч экендигин Мамлекеттик чек ара кызматы билдирди.
Учурда аталган аймакта Чек ара кызматынын төрагаcынын орун басары Таалайбек Усубалиев жүрөт жана эки өлкөнүн тиешелүү тараптары сүйлөшүүлөрдү жүргүзүүдө.
"Эки өлкөнүн чек арачылары сүйлөшүүлөрдү улантып жатышат. Кыргыз тарап Өзбекстандан чек аранын макулдашылбаган аймагынан аскер техникасын алып чыгууну талап кылууда", — деп айтылат билдирүүдө.
Аталган мекеме чек арага жакын жайгашкан аймак тургундарынын арасында түшүндүрүү иштери жүрүп, абал толугу менен Мамлекеттик чек ара кызматынын көзөмөлүндө экенин белгилейт.
Өз кезегинде Кыргызстан да эки БТР жайгаштырган.
Ошол эле күнү КР Тышкы иштер министрлиги Жалал-Абаддагы Кербен — Ала-Бука жолунун жабылышына байланыштуу каршылык нотасын тапшырып, блок постторду тез аранын ичинде ачууну талап кылган.
