БИШКЕК, 20-мар. — Sputnik. Кыргызстандын өкмөтү кыргыз-өзбек чек арасындагы абал боюнча ийне-жибине чейин иштелип чыккан планы бар деп өкмөттөгү булак Sputnik Кыргызстан маалымат агенттигине билдирди.
Белгилей кетсек, 18-мартта өзбек тарап Жалал-Абад облусунун Ала-Бука районунундагы Кыргызстан менен такталбаган чек арада зооттолгон эки транспортту жана КамАЗ үлгүсүндөгү эки автоунаа коюшкан. Ушул эле күнү Өзбекстан тарап бир жактуу негизде "Маданият" көзөмөл өткөрүү жайын жапкан. Өзбекстандын Улуттук коопсуздук кызматынын Чек ара комитети Нооруз майрамына көрүлгөн даярдыктан улам, чек араларын бир тараптуу бекемдегенин билдирген. КРдин Тышкы иштер министрлиги Өзбекстанга чек арадагы блок-постторду алуу боюнча нота жөнөткөн.
Ишенимдүү булактын айтымында, бул маселе өтө кылдаттыкты талап кылгандыктан өкмөттөгү ар бир бөлүмдө үчтөн киши нөөмөткө чыгууда.
Буга чейин Мамлекетти чек ара кызматынын төрагасы Райимберди Дүйшөмбиев окуя болгон аймакка барып, жергиликтүү элге чагымчыл азгырыктарга алдырбоо боюнча түшүндүрүү иштери жүрүп жатканын айткан.
