БИШКЕК, 20-мар. — Sputnik. Дин таануучу Кадыр Маликовго кол салды деп Түркиядан кармалган жарандардын бирөө Тилек уулу Алибек Кыргызстанга экстрадицияланганын КР Тышкы иштер министрлигиндеги булак билдирди.
Булактын айтымында, шектүү жаран 19-мартта КР ИИМдин кызматкерлеринин коштоосунда Стамбулдан Бишкекке учуп кетти. Ал эми экинчи жаран Ырыскул Бейшеналиевдин сот иши бүтө элек. Эгер сот аны да экстрадициялоо боюнча чечим кабыл алса ал да Кыргызстанга алып келинет.
2015-жылдын 26-ноябрында Бишкек шаарынын "Асанбай" кичи районунда теолог Маликовго бейтааныш эки киши бычак менен кол салып, бетке жана моюнга сайып кетишкен. Маликов шаардык 4-оорукананын реанимация бөлүмүнө алып келинип, операция жасалган. Кийинчерээк кылмышка шектүү делгендер Түркиянын Газиантеп шаарынан кармалган болчу. Алардын шериктери Бишкек шаарынан кармалган.
Маликов өзүнүн ишмердигинен улам ага "Ислам мамлекети" террордук тобунун өкүлдөрү кол салганын айткан.
