БИШКЕК, 27-ноя. — Sputnik. Бейтааныш кишилердин кол салуусуна кабылган теолог Кадыр Маликов арыз жазып кайрылганын Бишкек шаарынын Октябрь РИИБдин маалымат кызматы билдирди.
Теологго кол салгандар кимдер экени аныкталганын милиция билдирген. Алар Маликовго жакын жашаган кошуналары болуп чыккан. Буга чейин милиция кол салууга кабылган Маликов арыз жазуудан баш тартканын маалымдаган.
"Жабырлануучу да көрсөтмө берди. Маликовдун айтымында, кечээ аны жок кылууга аракеттер болгон", — деп ШИИБден билдиришти.
Жума күнү Маликовдун жакындары маалымат жыйын өткөрүп, жабырлануучунун аудио кайрылуусун таратышты.
Кадыр Маликов машинасынын жанына келгенде, анын жолун кара түстөгү БМВ машинасы тороп турганын айткан.
"Алар мени машинага салганга аракет кылып, дароо эле бычак жана электр шокер менен моюн жакка чапканга аракет кылышты. Мен башымды катып, аларга каршылык көрсөттүм. Кол салгандар экөө болчу. Алардын бирөө, "Аллаху акбар" деп кыйкырды. Алар мени машинасынын арткы орундугуна салууга аракет кылышты. Мен алардын колунан качып чыкканга үлгүрдүм, бети-башымдын кан жалаганына карабай, өтүп бараткан машиналардан жардам сурадым. Бирок алар токтогон жок", — деди ал.
Теологдун айтымында, аны жок кылууга Ракка шаарында ("Ислам мамлекети" террордук уюмунун борбору) чечим кабыл алынган.
"Жай айында "Ислам мамлекети" террордук уюмуна кирген топтор мени жок кылуу боюнча Ракка шаарында чечим кабыл алышканы тууралуу менде маалыматтар бар эле. Андан сырткары, мени менен чогуу Казакстандагы дагы бир теологду жок кылуу боюнча аракеттер тууралуу кабардар болчумун. Бул маалымат 100 пайыз анык", — дейт Маликов.
Маликов ага болгон кол салууну карактоо эмес, адам өлтүрүүгө болгон аракет катары баалоо керектигин суранат.
Бейшемби күнү кечки саат 19.14төрдө Асанбай кичи районундагы №52 үйгө жакын орун алган "Народный" дүкөнүнүн жанында белгисиз эки киши Кадыр Маликовду бет тушка сайып кеткени жөнүндө маалымат келип түшкөн. Алар окуя болгон жерден из жашырып кетишкен.
Жаракат алган Маликов шаардык 4-ооруканага жеткирилип, реанимация бөлүмүнө жаткырылган.
