БИШКЕК, 25-фев. — Sputnik. Депутат Жанар Акаев парламенттин отурумунда журналист Турат Акимовго болгон кол салуу боюнча иликтөөнү Улуттук коопсуздук кызматына берүү демилгесин көтөрдү.
"Акимов өзү ччки иштер министри Мелис Турганбаевди күнөөлөп чыкты, мен бир тарапты айыптоодон алысмын. Бирок Акимовдун ишин ИИМ эмес, УКМК иликтөөсү керек. Мындан сырткары, жакында эле башка журналисттин жеке жашоосун чагылдырган тасма интернетке жарыяланды. Мындай ыплас жол менен күрөшкөндөр ким болсо да жазага тартылышы зарыл", — деди депутат.
Акаев акыркы учурда сөз эркиндигине доо кетирген учурлар көп болуп жатканын белгилеп, алдын албаса бул көнүмүш адатка айланып кетиши мүмкүн экенин кошумчалады.
ЖК төрагасы Асылбек Жээнбеков бул ишти президент өзү көзөмөлгө алганын айтты.
"Турат Акимовдун иши боюнча мен ички иштер министри Мелис Турганбаев, УКМК жетекчиси Адил Сегизбаев менен жолугуп, сүйлөштүм. Мындан сырткары, ишти башкы прокуратура иликтейт. Парламент да көзөмөлгө алат", — деди спикер.
Өткөн жума күнү журналист Турат Акимовго кол салуу болгон. Дүйшөмбү күнү ал жыйын өткөрүп, кол салууга ИИМ башчысынын тиешеси болушу мүмкүн экенин айткан.
ИИМ журналистке кол салуу боюнча "бейбашчылык" беренесинин негизинде кылмыш ишин козгоп, Акимовдун министрге карата койгон айыптары суу кечпей турганын билдирген.
Эскерте кетсек, Жанар Акаев буга чейин журналист болуп эмгектенип, президенттин маалымат катчысы болуп иштеп келген.
