БИШКЕК, 16-мар — Sputnik. Кыргызстандык мектеп окуучулары убадаланган планшеттерди жаңы окуу жылында алышы мүмкүн экенин өкмөттүн маалымат кызматынын жетекчиси Назира Ахмедова билдирди.
Бирок шаршемби күнү айрым маалымат каражаттары Билим берүү жана илим министрлигинин премьердин айтканы тууралуу кабары жок экенин жазып чыгышты.
Ахмедованын айтымында, өкмөт башчы "Акылдуу мектеп" долбооруна таянып билдирүү жасаган. Ал эми планшеттер мектептер Интернетке туташкандан кийин гана берилмекчи.
"Интернетке кошулганга чейин планшеттердин эмне пайдасы бар. Андыктан гаджеттер түйүнгө туташкандан кийин гана берилет. Бул жаңы окуу жылында болушу мүмкүн. Каражат долбоордун алкагында бөлүнмөкчү", — деди ал.
"Акылдуу мектеп" долбоору "е-Окуучу", "е-Китеп", "е-Мугалим" жана "е-Мектеп" багыттарына негизделген. Анын алкагында 2016-жылы Интернетке миңден кем эмес мектепти туташтыруу каралган. Ал эми кийинки жылы калган окуу жайлар кошулмакчы.
