БИШКЕК, 15-мар. — Sputnik. Россия аскер күчтөрүнүн Сирия аймагынан чыгышы туура чечим экенин "Далил плюс" эксперттик клубунун серепчиси Марс Сариев билдирди.
Дүйшөмбү күнү РФ президенти Владимир Путин коргоо министри Сергей Шойгуга 15-марттан тарта Сириядагы россиялык аскер күчтөрүн чыгаруу боюнча буйрук берип, өлкө алдына койгон милдетин аткарганын белгилеген.
Ал эл аралык коалиция Россиянын аскер күчтөрү жетишкен ийгиликтери багынта албаганын белгиледи. Негизинен ИМ инфраструктурасынын ири бөлүгү кыйроого учурады. Согушкерлер уюм катарынан качып чыгып, эң башкысы ок атуу токтотулду.
"Операция жарым жылга чейин эле созулары башында эле айтылган. Россиянын аракети Сириядагы кыйроо алдында турган абалды жөнгө салды. Эми Жакынкы Чыгыш аймагында тынчтыкты орнотуу саясий чечимдерге көз каранды болот", — деди Сариев.
Муну менен бирге эксперт россиялык күчтөрдүн кетиши менен Сирия Ирактын кейпин кийиши толук ыктымал экенин жашырбайт. Буга Сирияны федерализацилоого болгон чакырыктар себеп болушу мүмкүн.
"Дал ушул себептен Россия Сирия элине гуманитардык жана башка жардам көрсөтүү менен өз таасирин сактап калат", — дейт эксперт.
Россиянын аскер күчтөрү Сириянын өкмөтүн колдоо жана "Ислам мамлекети" террордук тобуна каршы туруштук берүү максатында былтыркы жылдын 30-сентябрында өлкөгө киргизилген. Бул убакытта Россиялык учкучтар террористтердин миңге чукул объектилерин кыйроого учураткан.
