БИШКЕК, 14-мар. — Sputnik. Кызмат абалынан кыянаттык менен пайдаланып, айыпталуучу менен саунага барып эс алып, ошол жактан аны качырып жиберген күзөтчүлөр камакта калтырылды. Бул тууралуу Жогорку сот билдирди.
Эскерте кетсек, эки жума мурун 27 жаштагы соттолуучу Азатбек Алымкулов Аламүдүн районунда өтүүчү сот процессине алып келген күзөтчүлөрдүн колунан качып чыккан.
Маалыматка ылайык, сотко бара жатып күзөтчүлөр Алымкуловду үйүнөн жубайы жана кызы менен жолуктуруп, ал жактан чыккандан кийин чогуу саунага барышкан. Айыпталуучу ошол жерден качып кетүүгө үлгүргөн.
Чүй облустук соту аталган ишти карап, биринчи инстанциянын чечимин күчүндө калтырды.
Ал эми Алымкулов эки жумадан кийин Бишкектеги "Туңгуч" кичи районунда өң-келбетин өзгөртүп, "кош бойлуу" абалында кармалган.
Чүй ИИББдин маалыматына ылайык, 1989-жылы туулган Азатбек Алымкулов Нарын облусунун Жумгал районунда төрөлгөн. Бишкек шаарында "Түштүк-2" кичи районунда №2 үйдүн 42-батиринде жашап келген.
Ал КРдин Кылмыш жаза кодексинин 168-беренеси (Каракчылык) боюнча соттолууда.
