БИШКЕК, 29-фев. — Sputnik. Кыргыз мамлекеттик медициналык академиянын ректорат кеңеши аталган окуу жайдын аппарат жетекчиси Абдикарим Гапаровдун өлүмү боюнча бийликке кайрылганын ЖОЖдун маалымат кызматы билдирди.
Окуу жайдын кеңеши президент Алмазбек Атамбаевге, Жогорку Кеңештин төрагасы Асылбек Жээнбековго, премьер-министр Темир Сариевге жана башкы прокурор Индира Жолдубаевага кайрылуу жолдогон. Анда Гапаровдун өлүмүнө Коррупцияга каршы кызматынын (ККК) өкүлдөрү себеп болгону айтылат. Күбөлөрдүн айтымында, УКМК кызматкерлеринин ыкчам иликтөө иш-чаралары жасалма мүнөздө болгон.
Кайрылууда окуу жайдын кызматкеринин тинтүүнү тынч өткөрүү өтүнүчү четке кагылганы келтирилет.
"УКМК кызматкерлери кайра бизди коркутуп, "силерге да жетебиз" деп кыйкырып жатышты. Кесиптештерибиздин Тез жардам чакыралы дегенине көнбөй, медициналык жардам көрсөтүүгө жол беришкен жок. Маркумдун жүрөк оорусу күчөп, өз учурунда жардам көрсөтүлбөй калды. Кеч келген Тез жардам кызматкерлери анын каза болгонун гана тастыктап беришти", — деп айтылат билдирүүдө.
Окуу жайдын кызматкерлери Гапаровдун кабинетинен чачылган кагаздарды, жерде жаткан галстук менен саат табышканын айтып, маркумдун көйнөгү айрылып, эмеректердин сынганына күбө болушкан. Окуя болгон жерге келген Октябрь районунун прокурору менен тергөөчүлөрү зордук-зомбулук аракеттерин каттап кетишкен.
"ККК кызматкерлеринин жосундуу жоругуна нааразыбыз. Биздин баамыбызда, алар кимдир бирөөнүн буйругун аткарып, биздин бүтүндөй эмгек жамаатыбызга көө жабуу аракетин жасагандай болушту. Ректорат кеңеши бул фактынын тергелишин бийликтин жеке көзөмөлүнө алуусун жана күнөөкөрлөрдү жазага тартууну өтүнөт", — деп жазылат кайрылууда.
УКМК бул маалымат боюнча үн ката элек. Ал эми Башкы прокуратура экспертизанын жыйынтыгы күтүлүп жатканын, азырынча аталган факт боюнча кылмыш иши козголо электигин билдирди.
