БИШКЕК, 25-фев. — Sputnik. Иса Ахунбаев атындагы Кыргыз мамлекеттик медициналык академиясынын аппарат жетекчиси пара алып жаткан жеринен кармалып, жүрөгү токтоп калды. Бул туурасында УКМКнын маалымат кызматы билдирди.
Маалыматтарда 23-февралда УКМКнын Коррупцияга каршы кызматына Е.С. аттуу жаран Кыргыз мамлекеттик медициналык академиясынын аппарат жетекчисине карата чара көрүү арызы менен кайрылган.
"Ал жаран аппарат жетекчиси кабинетине бир нече ирет чакырып аталган окуу жайдын аймагында жайгашкан павильондун ижарасы үчүн 30 миң сом каражат талап кылгандыгын билдирген", — деп айтылат УКМК тараткан маалыматта.
Ал эми тариф боюнча белгиленген ижара акысы айына 2,5 миң сом болгон.
25-февралда ыкчам-тергөө иштеринин натыйжасында, аталган окуу жайдын аппарат жетекчиси иш бөлмөсүндө 30 миң сом пара менен кармалган. Тинтүү учурунда, айтылган суммадагы акча табылгандан кийин, ал эс-учун жоготуп, "Тез жардам" чакырылган. Медиктердин сактап калуу аракети майнап бербей, ал киши көз жумган.
