БИШКЕК, 26-фев. — Sputnik. Пара алып жаткан жеринен колго түшүп, каза болгон Медициналык академиянын аппарат жетекчиси Абдикарим Гапаров буга чейин эки жолу инфаркт болгонун академиянын маалымат катчысы Абибилла Пазылов Sputnik Кыргызстан маалымат агенттигине билдирди.
Буга чейин Улуттук коопсуздук боюнча мамлекеттик комитеттин маалымат кызматы окуу жайдын аппарат жетекчиси 30 миң сом пара алып жаткан жеринен кармалып, тинтүү учурунда каза болгонун билдирген. Ал параны окуу жайдын аймагынан соода күркөсүнө жер берүү боюнча алган. Алдын ала маалыматтар боюнча ал жүрөгү кармап каза болгон.
Академиянын маалымат катчысынын билдиришинче Гапаров 62 жашта болгон жана жүрөгү ооругандыктан кардиологияда каттоодо турган.
"Чогуу иштегендер аны жакшы адам катары билишет. Ал камкор жана өзүнүн ишин жакшы билген адис болчу. Анын артында уулу жана кызы калды жана беш жаштагы небереси бар эле", — дейт ал.
Абибилла Пазылов аталган окуянын чоо-жайын укук коргоо органдары иликтеп жатканын билдирип, аны жерге берүү зыйнаты эртең Бишкек шаарында болорун кошумчалады.
