БИШКЕК, 28-фев. — Sputnik. Аламүдүн РИИБ күзөтчүлөрүнөн качып кеткен соттолуучу азырынча табыла электигин Sputnik Кыргызстан агенттигине Чүй ОИИБ Башкы башкармалыгы билдирди.
Жума күнү 27 жаштагы кылмышкер Азатбек Алымкуловдун качып чыкканы белгилүү болгон. Каракчылык боюнча айыпталган жаран Аламүдүн районунда өтүүчү сот процессине алып келген күзөтчүлөрдүн колунан качып кеткен. Азырынча анын сот маалында же андан кийин качканы так аныктала элек. Буга чейин бир нече ирет кесилген Алымкулов төрт шериги менен май куюучу жайды карактап жарым миллион сомго чукул каражатты алып кетти деп айыпталып келген.
Учурда кылмышкерди издөөгө облустан башкы башкармалыгы менен Бишкек милициясы кызматкерлери тартылды. ИИМдин коопсуздук кызматы Алымкуловдун качуусуна милиция кызматкерлери жардам берди деген шек бар экенин белгилешүүдө.
