БИШКЕК, 19-фев. — Sputnik. Борбор калаанын башчысына талапкер Албек Ибраимовдон кыргыз тили боюнча экзамен алган атайын комиссия анын кыргыз тилин биле турганын аныктады.
Атайын комиссиянын жетекчиси Эгемберди Эрматов Ибраимовго көркөм окуу жагына көңүл бурушу керектигин айтты. Өз кезегинде Ибраимов шашып калгандыктан айрым учурларга көңүл бурбай калганын белгиледи.
Эрматов ошондой эле, эгер мэр болуп шайланып калса шаардагы көрнөк-жарнактарды көңүл тышында калтырбашы керектигин айтты.
"Сизден көрнөк-жарнак боюнча мыйзамды так аткарышыңызды күтөбүз. Бул жагынан жаман акыбалда. Шаардагы көчөлөрдүн аталышы каалагандай жазылып жатат", — деди ал.
Андан сырткары шаардык кеңештин жыйындарын синхрондук которуу үчүн атайын жабдыктарды алып келип орнотууну суранып, кимдир бирөөнүн тилди билип, билбегенине шек келбеши керектигин кошумчалады.
Эске салсак, Кубанычбек Кулматов 9-февралда отставкага кеткен. Учурда мэрдин милдетин вице-мэр Айгүл Рыскулова аткарып жатат. Ал эми жаңы мэрди шайлоо 27-февралда өткөрүлөт.
