БИШКЕК, 19-фев. — Sputnik. Жогорку Кеңештеги "Республика — Ата-Журт" фракциясы Бишкек шаар мэрин калаа тургундары шайлоо боюнча мыйзам долбоорун колдоду. Бул тууралуу Жогорку Кеңештин маалымат кызматы билдирди.
Жума күнү фракциянын жыйыны болуп, анда депутаттар тарабынан сунушталып жаткан мыйзам долбоору талкууга алынган. Ал боюнча депутат Мирлан Жээнчороев түшүндүрүп берди. Эл өкүлү шаар башчысын калаа тургундары тандоосу керектигин айтып, учурда мэрди шаардык кеңештин депутаттары шайларын белгиледи.
"Биз сунуштаган толуктоолор мэрди шайлоону шаардык кеңешке депутаттарды шайлоо менен бирге өткөрүүнү сунуштайт. Эң көп добуш алган талапкер шаар башчысы болот. Биз шайлоону бир нече этап менен өткөрүүнү жокко чыгарууну сунуштап жатабыз", — дейт ал.
Эл өкүлү сунушталган мыйзам долбоору боюнча талапкерлерге бир катар талаптар коюларын белгиледи. Анын жогорку билими, иш тажрыйбасы, 35 жаштан кичүү жана 65 жаштан улуу болбошу керек. Андан сырткары сот жообуна тартылбоосу зарыл, же соттон акталганы тастыкталышы керек.
"Мамлекеттик тилди билүүсүн же дагы башка сапаттарга ээ болуусу керектигин шаардыктар өздөрү аныкташы керек", — дейт демилгечи депутат.
Талкууга катышкан эл өкүлдөрү демилгеленген мыйзам долбоору кабыл алынса шаардыктардын коомдук маанилүү иштерге активдүү катышуусун шарттайт деп эсептешет.
Талкуунун жыйынтыгында депутаттар мыйзам долбоорун колдоого алды.
