БИШКЕК, 13-фев. — Sputnik. Кыргызстандын футзал боюнча курама командасы экинчи турда өзбекстандык атаандашына минималдык эсеп менен жеңишти алдырып койду.
Биринчи болуп өзбек командасы дарбазага топ киргизди. Ал эми экинчи таймда аталган команда эсепти дагы бир голго көбөйтүүгө жетишти. Оюндун аягына аз калганда кыргызстандык машыктыруучу Андрей Полховский тайм-аут алды. Ошондон кийин кыргызстандык футзалчылар атаандаштын дарбазасына бир гол киргизишти. Мында сол жактан топту кабыл алган Максадбек Алимов өзгөчөлөнө алды. Оюн 1:2 эсеби менен өзбекстандык команданын пайдасына аяктады.
Кыргызстандын футзалчылары кийинки оюнду Сауд Аравия командасы менен өткөрөт.
"А" тайпасында алты упай менен Өзбекстандын командасы алдыда келе жатат. Ливан командасынын куржунунда эки упай болсо, Кыргызстан менен Сауд Аравия бирден упай алууга жетишти.
Чемпионат Ташкент шаарында өтүүдө. 16 команданын ичинен мыкты аталган беш команда быйыл Колумбияда өтө турган Дүйнө чемпионатына катышууга мүмкүнчүлүк алат.
