БИШКЕК, 10-фев. — Sputnik. Кыргызстан командасынын башкы машыктыруучусу жана насаатчылары футзал боюнча өтө турган Азия чемпионатынын алдында өз пикирлерин билдиришкен. Бул тууралуу Футбол федерациясы билдирди.
Азиянын биринчилиги 10-февраль күнү Ташкентте башталат. Кыргызстандык командага Өзбекстан, Ливан жана Сауд Аравиясынын оюнчулары атаандаш болуп, биринчи оюнун Ливан футболчулары менен өткөрөт.
Кыргызстан командасынын башкы машыктыруучусу Андрей Полховский:
— Команда абдан жакшы иштеп, чемпионатка мыкты даярдык менен келди. Акыркы машыгуулар Москвада өтүп, бир нече жолдоштук беттешүүлөрдү өткөрдүк. Менин командам чемпионатка даяр! Ар бир машыктыруучу өз командасында мыкты гана оюнчулар болсо дейт. Азыркы курамга ыраазымын. Балким, команданы мындан да күчтөндүрө турган бир-эки футболчу бардыр, бирок шартка байланыштуу алар бул жерге келе алган жок. Кыргызстанда футзал өнүгүү жолуна түштү. Жакынкы жылдарда командабыз жаш жана таланттуу оюнчулар менен толукталат.
— Биз Европада да, Азияда да жетиштүү деңгээлде жолдоштук беттешүүлөрдү өткөрүп келдик. Тайпабыз абдан күчтүү. Өзбекстан Дүйнө чемпионатынын финалдык бөлүгүндө ойногон эмес. Бул жолу ошол кыялыбызды ишке ашырууга аракет кылабыз.
Ливан командасынын машыктыруучусу Франциско Араужо:
— Бул турнирлерде ойноо барган сайын татаал болуп бара жатат. Командалардын деңгээли өсүүдө. Биз турнирге жакшы даярданып келдик. Кыргызстандын командасы күчтүү атаандаш экенин белгилеп кетким келет. Тилекке каршы, биздин команданын бир нече күчтүү оюнчулары алган жаракаттарынан улам келе албай калды.
Сауд Аравия командасынын машыктыруучусу Абдуллах Аль Рашуд:
— Бул жакка келгенибизге абдан ыраазы болуп жатабыз. Жакшы жыйынтык көрсөтүүгө болгон күчүбүздү жумшайбыз. Атаандаштарыбыз абдан күчтүү. Жеңгенге аракет кылабыз.
Мелдештин беш мыкты командасы Колумбияда өтө турган дүйнө чемпионатына катышууга жолдомо алат.
