БИШКЕК, 11-фев. — Sputnik. Ата-энесинин кордугунан улам Бишкек шаарына качып келди деген 17 жаштагы Назбийкенин окуясы боюнча кылмыш иши козголгонун ИИМ билдирди.
Окуянын чоо-жайын аныктоо үчүн укук коргоо органдарынын кызматкерлери ишти жеринен иликтеген. Соттук-медициналык экспертиза дайындалып, Сузак РИИБдин жаш өспүрүмдөр менен иштөө инспекциясынын жетекчиси борбор калаага чакыртылган.
17 жаштагы кыздын буга чейин да бир нече жолу үйүнөн качып кеткени аныкталган. Сузак райондук ички иштер бөлүмүнө кыздын апасы кайрылып, 2016-жылы 26-январда кызы чыгып кеткен боюнча кайтып келбегенин айткан. 27-январда аймактык инспектор кызды Жалал-Абад шаарынан таап, ата-энесине кайтарып берген.
Кыздын туугандарынын айтмында, 28-январда ал апасы менен Жалал-Абад шаарына бармак, бирок автовокзалдан ажатканага барып келем деп апасынан суранып, ошол бойдон кайтып келген эмес.
Соттук-медициналык экспертизанын жыйынтыгына ылайык, кыздын денесине жеңил жаракат келтирилген.
Бардык материалдар Сузак райондук ички иштер бөлүмүнө берилип, кылмыш жаза кодексинин 111-беренеси ("Кыйноо") боюнча кылмыш иши козголду.
